गुरुपौर्णिमा २०२४
आपल्या अशक्त आणि दुबळ्या मुलावर आई-वडील अधिक प्रेम करत असतात कारण त्यांना माहीत असतं की आपल्या शिवाय हा तग धरू शकणार नाही. माझ्या योगजीवनात भगवान महादेव बाबा आणि भगवती गौरा माईने मला अक्षरशः तशी माया दिलेली आहे.
नवखा साधक ते योगी हा खडतर प्रवास त्यांच्या आशीर्वादाशिवाय माझ्यासाठी अशक्यप्रायच होता. ज्याने मला मंत्र देऊन जपात् सिद्धिः जपात् सिद्धिः जपात् सिद्धिर्न संशयः चे बाळकडू पाजले आणि एक दिवस माझ्या जपाचे रूपांतर अखंड अजपा जपात कायमचे करून टाकले त्या शंभू महादेवाचे आभार तरी कोणत्या शब्दांत मानू!? त्यांचे आभार वगैरे मानलेले त्यांना आवडतही नाहीत त्यामुळे कोणत्याही औपचारिक रितीरिवाजात न जाता आजच्या गुरुपौर्णिमेच्या दिवशी त्यांच्या चरणी अधिक लीन होतो आहे.
खरंतर माझ्यासाठी भगवान दत्तात्रेय हा शिवावतारच पण त्यांची ज्ञान देण्याची पद्धत थोडी वेगळी. माझा हा अवधूत प्रचंड शिस्तप्रिय आणि काटेकोर. दिलेली साधना झाली पाहिजे म्हणजे झाली पाहिजे. काय वाटेल ते होऊ द्यात. महादेवाने दिलेल्या साधनेत माझ्याकडून अज्ञानवश ज्या त्रुटि किंवा दोष राहायचे ते निस्तरण्याची जबाबदारी आपणहून स्वीकारणारा हा कनवाळू. मायबापाचा ओरडा कधी खाऊ दिला नाही दत्तात्रेयांनी. आजच्या दिवशी त्यांच्या चरणी दृढ भक्ति अर्पण करणे एवढेच मी करू शकतो.
गोरक्षनाथ म्हणजे शंभू जती किंवा शिव योगी. जणू प्रति-शंभूच. वरकरणी काहीसे फटकळ आणि कडक वाटणारे पण आतून एकदम प्रेमळ. दिवसात चोवीस तास असतात. त्यातील एक चतुर्थ वेळ साधनेसाठी बाजूला काढायचा आणि मग उरलेल्या वेळात जगातल्या उठाठेवी करायच्या असा दंडक त्यांनी मला घालून दिला होता. त्यांनी करवून घेतली म्हणून माझ्याकडून साधना दृढतापूर्वक घडली. आजच्या गुरुपौर्णिमेला त्यांच्या चरणी माथा टेकतो आणि त्यांच्या नावाची विभूति मस्तकी धारण करतो.
तुम्ही जर माझ्या श्रीगुरुमंडलाला मानणारे असाल किंवा ऑनलाइन कोर्स केलेले असाल तर आज येथे दिलेल्या सुलभ उपासनेचा लाभ अवश्य घ्या. आज सर्वजण आपापल्या गुरूंच्या स्मरणात व्यग्र असणार आहेत त्यामुळे आज एवढेच. गुरूपौर्णिमेच्या मनःपूर्वक शुभेच्छा !!
॥ ॐ नम: शिवाय ॥
© हा लेख कॉपीराइटद्वारे संरक्षित आहे. लेखाची लिंक शेअर करू शकता परंतु कोणत्याही स्वरूपात पुनर्मुद्रण किंवा पुनर्प्रकाशन करण्यास परवानगी नाही.
प्रिय वाचकांनो,
गेल्या अनेक वर्षांपासून आम्ही आमच्या वेब साईटवर योग-अध्यात्म विषयक लेखन प्रकाशित करत आहोत. हे लेखन अन्यत्र वापरण्याची किंवा पुनर्मुद्रित करण्याची कोणालाही परवानगी दिलेली नाही. तरीही काही लोकांनी आमचे लेखन फेसबुक, व्हॉटसअॅप, ब्लॉग इत्यादी माध्यमांतून मूळ लेखकाचे नाव व स्रोत न देता प्रकाशित केले आहे. काहींनी तर ते स्वतःच्या नावे प्रसिद्ध केले आहे—हे साहित्यचौर्य निंदनीय आणि खेदजनक आहे. भारतीय कायदा योग्य वेळी कार्य करेलच, पण आम्ही आमच्या सुजाण वाचकांना विनंती करतो की त्यांनी अशा साहित्य चोरांपासून सावध रहावे. अशा व्यक्तींशी आमचा कोणताही संबंध नाही. ही वेब साईट हे आमचे लेखन प्रकाशित होण्याचे एकमेव अधिकृत माध्यम आहे.
धन्यवाद.
— वेब टीम